廣州萬里行

剛剛過左既禮拜日, 同朱朱去左廣州痛苦一日遊....去片!!

晨咁早八點鐘就扑起身,飛快地梳洗一輪後,就同佢坐巴士到上水火車站..一到達火車站,已見週遭環境不妙 -- 個個一家大細三袋四袋咁搬屋搬廠搬寫字樓......都ok啦~幸好車廂裏面都未至於要到蘿柚貼蘿柚既境地....話咁快到左羅湖火車站.........衝呀!!!個個好似做左短跑好手咁,我地都唔想跑架,但唔跑真係俾後面啲車仔碌死冇命賠.......run!run!!run!!!

過到香港海關真係快捷便利喎,皆因有個"e道"嘛!!但其實我每次搭飛機過"e道"既時候都非常緊張,因為三次著左兩次,我印個手指公落去scan既時候都係唔成功既...!!搞到一碌木咁企响度,向後行又唔係,向前行又唔得...要等阿海關哥哥特登走過黎用人手check黎俾我過...真老土!!不過今次非常咁開心,出境&入境都好順利~^o^~跟住就同朱朱到深圳轉搭"和諧號"列車到廣州火車站勒~let's go!!

上到呢個"和諧號"列車裏面,又確係几思服喎!!可能架車都仲係几新淨啦~不過個車廂廁所係"踎廁"....oh no!!好彩成程車都唔急急啫!! ^3^...

不過其實上車之前都有段小插曲架...我地原本應該要搭既係廣州火車站總站既車,但買票時條茂利就發左兩張往"廣州東站"既票俾我地...到排隊上車時才發覺!好彩經過一小時既車程,到左總站再轉地鐵,都好快就到左我地既目的地 -- 海珠廣場站 --

到達左目的地後,就展開左當日既"公益金百萬行"勒 -- 整個區都係各式各樣既物品批發,食得既又有..唔食得既又有..總之睇到我眼花撩亂啦.....但當然所有野都係得個"睇"字,完全挑唔起我原始野性既購買慾望.....zzzz

行呀..行呀...行呀.......硬係行極都似行唔完咁...酷熱既天氣下,就好似在沙漠中漫行......唉..朱朱仲暗示話我唔捱得.....呢趟真係好sim做壞樹囉.....~~

終於捱到大約七點左右,完成左今趟既旅程!!可用四字形容 -- 悲喜交集!! 悲既當然係行極都行唔完既大街小巷,太陽乾煎下既生理同心理都絶不好受.....喜既當然係朱朱處處發揮大男人既本色,對我照顧有加...抵錫!!